ថ្ងៃមួយមានគូស្នេហ៍មួយគូបានជជែកគ្នាលេង។ នារីជាសង្សារក៏បានសួរទៅកាន់មិត្តប្រុសរបស់នាងថា៖ នារី៖ ហេតុអ្វីបានជាបងស្រលាញ់អូន? បុរស៖ បងមិនដឹងអំពីមូលហេតុរបស់វានោះទេ ប៉ុន្តែបងពិតជាស្រលាញ់អូនខ្លាំងណាស់។ នារី៖ បងមិនអាចប្រាប់ខ្ញុំសូម្បីតែហេតុផលរបស់វា, អ៊ីចឹងធ្វើម៉េចបងអាចនិយាយបានថា បងស្រលាញ់អូនទៅ? តើបងអាចនិយាយថាបងស្រលាញ់អូនដោយរបៀបណា? បុរស៖ បងពិតជាមិនដឹងអំពីហេតុផលពិតមែន ប៉ុន្តែបងអាចពិសោធន៍ថាបងពិតជាស្រលាញ់អូនមែន។ នារី៖ ពិសោធន៍? ទេ, អូនគ្រាន់តែចង់អោយបងប្រាប់អូនអំពីហេតុផលតែប៉ុណ្ណោះ។ សង្សារមិត្តភក្តិអូនអាចប្រាប់នាងបានថា ហេតុអ្វីបានជាគាត់ស្រលាញ់នាង ប៉ុន្តែបងមិនអាចនោះទេ។ បុរស៖ អូខេៗ....!!! អ៊ឺ... ព្រោះតែអូនស្អាត, សម្លេងរបស់អូនពិរោះ, អូនពូកែថ្នាក់ថ្នម, អូនគួរអោយស្រលាញ់, អូនជាមនុស្សចេះគិត, ស្នាមញញឹមរបស់អូន, និងគ្រប់សកម្មភាពរបស់អូន។ នារីជាសង្សារមានអារម្មណ៍ពេញចិត្តយ៉ាងខ្លាំងចំពោះចម្លើយរបស់ដៃគូ។ ជាអកុល, មួយខែក្រោយមកនាងបានជួបគ្រោះថ្នាក់ចរាចរណ៍ធ្ងន់ធ្ងរមួយ ដែលបណ្តាលអោយនាងក្លាយជាមនុស្សភ្លឹកបាត់បង់ស្មារតី (coma)។ បុរសរន្ធត់ជាខ្លាំងពេលដែលទទួលបានដំណឹងនេះ។ គេតែងតែទៅកំដរនាងជារៀងរាល់ថ្ងៃ ប៉ុន្តែពីមួយថ្ងៃទៅមួយថ្ងៃកាន់តែឃ្លាតចាកពីក្តីសង្ឃឹម។ ជាយូរខែថ្ងៃ, នាងនៅតែទាន់មិនដឹងខ្លួនឡើងវិញ។ បុរសមានអារម្មណ៍អស់សង្ឃឹម ហើយគេក៏បានសរសេរកូនសំបុត្រមួយទុកនៅក្បែរនាង។ គេសង្ឃឹមថាថ្ងៃណាមួយណានាងនឹងភ្ញាក់ដឹងខ្លួនអានសំបុត្រនេះបាន។ ថ្ងៃមួយនារីក៏បានដឹងខ្លួនឡើងវិញ ហើយនាងបានរកឃើញសំបុត្រមួយ ដែលបុរសជាសង្សារសរសេរទុកអោយនាង។ សេចក្តីនៅក្នុងសំបុត្រ៖ «អូនធ្លាប់សួរបងថា, ហេតុអ្វីបានជាបងស្រលាញ់អូន? បងក៏ធ្លាប់ប្រាប់អូនថា, បងមិនដឹងអំពីហេតុផលនោះទេ, បងដឹងត្រឹមតែថា​ បងស្រលាញ់អូន។ ប៉ុន្តែអូនចង់បានហេតុផលនៃការស្រលាញ់របស់បង ដូច្នេះប្រសិនបើបងស្រលាញ់អូន... ក៏ព្រោះតែសម្លេងដ៏ផ្អែមល្ហែមរបស់អូន... ពេលនេះអូនមិនអាចនិយាយបានទៀតទេ ហើយក៏ប្រហែលជាលែងនិយាយជារៀងរហូតផង! ដូច្នេះបងពិតជាមិនអាចស្រលាញ់អូនបានទៀតទេ។ ក៏ព្រោះតែការខ្វាយខ្វល់យកចិត្តទុកដាក់របស់អូន ទើបបងស្រលាញ់អូន... ប៉ុន្តែពេលនេះអូនមិនអាចបង្ហាញវាបានទៀតទេ, ដូច្នេះបងមិនអាចស្រលាញ់នោះទេ។ ក៏ព្រោះតែស្នាមញញឹមរបស់អូន និង សកម្មភាពគ្រប់យ៉ាងរបស់អូន ទើបបងស្រលាញ់អូន... ប៉ុន្តែពេលនេះអូនមិនអាចញញឹម ហើយក៏មិនអាចកំរើកបានទៀតដែរ ដូច្នេះបងមិនអាចស្រលាញ់អូនបានទៀតទេ។ ប្រសិនជាស្នេហាពិតជាត្រូវការហេតុផលពិតមែន, អ៊ីចឹងឥលូវនេះគ្មានហេតុផលអ្វី ដែលអាចអោយបងស្រលាញ់អូននោះទេ។ ប៉ុន្តែការស្រលាញ់របស់បងចំពោះអូន ពិតជាមិនត្រូវការហេតុផលនោះទេ។ ដូច្នេះហើយបងនៅតែស្រលាញ់អូន.... ឆាប់បើកភ្នែកឡើងអូនសម្លាញ់។ ក្រោកមកធ្វើជាកូនក្រមុំរបស់បង។ ការស្រលាញ់របស់អូនចំពោះអូនគឺគ្មានហេតុផលនោះទេ។ វាកើតចេញពីក្នុងចិត្ត ហើយនេះក៏ជាក្តីស្រលាញ់ពិតផងដែរ»។ បន្ទាប់ពីអានសំបុត្រចប់នារីពិតជារំភើប និងពេញចិត្តនូវអ្វីដែលបុរសជាគូស្នេហ៍សរសេរអោយនាងជាខ្លាំង។ នេះហើយទើបហៅថាស្នេហាពិត។ ស្នេហារវាងមនុស្សពីរនាក់អាចកើតមានឡើង ប្រហែលជាគ្មានហេតុផលនោះទេ៕

2017-01-28T20:27:00-08:00

រឿងខ្លី៖ ស្នេហាត្រូវការហេតុផលដែររឺទេ?